عشاق يتمنون منحهم تصاريح عن حظر التجول

0 2

دام الحجر توه وباقي مطول
عزالله ان اهل المحبه مجاريح

بعد أذنكم يامانعين التجول
أعطو لعشاق المحبه تصاريح

   *سعد بن سنان الثبيتي*

———————————-
الوضع ماهو ياسعد زيه اول
الوضع ما يحتاج ياخوك توضيح

مع المرض شوف المناظر تهول
خلك ببيتك قبل تنصاب وتطيح

     *ماجد نايف العصيمي*

———————————-
اليا طفشت اكتب قصيده ومول
خلك بوسط البيت مابه مراويح

ما انته من العشاق شاعر مخول
ولاهو بوقته تشكي الحب وتبيح

     *عبدالله سامر المطيري*

الوضع متكهرب والاول تحوّل
ماهيب لحية عشق والا مفاطيح

الزول حتى من قريبه يزوّل
الله يزيل الشر قبل التراويح

        *هلال عوض الديحاني*

———————————
الحب خليناه بالوقت الاول
ماعاد هي لحية مراح ومساريح

الله يرد الوضع مثله منول
نبي نقضيها تلاوه وتسبيح

        *ذياب عوض المطيري*

———�—�—�
من شاعرٍ ماقال بيتٍ مقول
ويتعب على خوة بعيد المشاويح

نرفع يدينا للولي ونتسول
انه يصحح كل الاوضاع تصحيح

             *خويتم سعد الحارثي*

————————
من هاجس بين المحاني تحول
وضفا عليهن مثل نور المصابيح

وخلا عيوني من دموعي تهول
دمعة ولا ماهي دموع التماسيح

منصور بن دغيم الديحاني*
————————
*يازين وقتن فات كنّا إنتجول *
*بين النشامه والوجيه المفاليح *

*واليوم كلن ماسكلّه :: محول *
*يتابع أخبار الدول والتصاريح *

بدر بن عطاالله الوطيباني *


لا ياسعد اهل المحبه مهول
…. حنا شكينا فراق ناسا(ن) مفاليح

اللي مع الاذان فالصف الاول
..فرقاهم اقوى من فراق المماليح

محمد عفار البديري
—�—�—�—�—�-
انا اشهد ان الوقت الاول تحول
وهموم بقعا كل ابوها مراويح

اقلط على المصحف وخل التجول
ثم تنفرج مع كل ركعه وتسبيح

علي بن حيدان المسردي
—�—�—�—�—
أمر الهوى جابك علينا محوّل
يابن سنان تجاوب الورق وتصيح

وماودنا مثلك بحظر التجول
لكن عشان الصوم ثم التراويح

محمد بن عبدالله القريوي الفهري

نسعد بتواجدكم معنا ونرحو المحافظة على الذوق العام واحترام الآخرين والرقي بالرد.

%d مدونون معجبون بهذه: